ភ្នំពេញ៖ វ៉ាក់សាំងការពារជំងឺកូវីដ-១៩ ចំនួន ២លានដូសបន្ថែមទៀតនឹងត្រូវបានប្រទេសចិនផ្ដល់មកឱ្យកម្ពុជានៅថ្ងៃទី១៧ ខែវិច្ឆិកាខាងមុខ។ ហើយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន នឹងអញ្ជើញទៅទទួលដោយផ្ទាល់ក្នុងពិធីទទួលវ៉ាក់សាំងនាថ្ងៃនោះផងដែរ។ នេះបើតាមការបញ្ជាក់របស់រដ្ឋលេខាធិការក្រសួងសុខាភិបាល លោកស្រី យក់ សម្បត្តិ នារសៀលនេះ។

ថ្លែងក្នុងពិធីទទួលវ៉ាក់សាំង ពីយន្តការកូវ៉ាក់ នាល្ងាចនេះ លោកស្រី យក់ សម្បត្តិ មានប្រសាសន៍ថា៖ «មកដល់ពេលនេះកម្ពុជាបានទទួលវ៉ាក់សាំងសរុប ៣៨លានដូសជាង។ ហើយនៅថ្ងៃទី១៧ ខែវិច្ឆិកាខាងមុខនេះ សម្តេចតេជោ ហ៊ុន សែន នឹងអញ្ជើញមកទទួលវ៉ាក់សាំងចំនួន ២លានដូសទៀតពីប្រទេសចិន។ អញ្ជឹងគិតទាំងលើកនេះកម្ពុជាមានវ៉ាក់សាំងសរុបទាំងអស់ជាង ៤០លានដូសហើយ»។

បើតាមលោកស្រី យក់ សម្បត្តិ ការដែលមានវ៉ាក់សាំងកាន់តែច្រើនក្នុងស្ដុកគឺនឹងជួយកម្ពុជាបានកាន់តែច្រើនក្នុងការប្រយុទ្ធនឹងជំងឺកូវីដ-១៩ ដើម្បីធ្វើឱ្យស្របតាមស្ថានភាពវិវត្តន៍នៃជំងឺរាតត្បាតនេះ៕